सुर्खेत, विधार्थीहरुलाई खेल क्षेत्रमा आबद्ध हुन प्रोत्साहित गर्ने उद्देश्यका साथ नेपाल ओलम्पियन संघले आयोजना गरेको स्कुल टु ओलम्पिक कार्यक्रमको दोस्रो चरण कर्णाली प्रदेशमा सोमबार सम्पन्न भएको छ ।
कर्णालीका जुम्ला र सुर्खेत दुई जिल्लामा विभिन्न विद्यालयका विधार्थीहरुको बीचमा स्कुल टु ओलम्पीक कार्यक्रम आयोजना भएको थियो । जुम्लामा फागुन १२ गते कार्यक्रम भएको थियो । एसओएस हर्मन माइनर विद्यालय सुर्खेतमा सोमबार ओलम्पियन दीपक विष्ट, देवु थापा, कमलबहादुर अधिकारी तथा १३ औं दक्षिण एसियाली खेललकुद (साग) का स्वर्ण पदक विजेता दीपक हमालले आ आफ्नो खेल जीवनको आरोह अवरोहका बारेमा चर्चा गर्नु भएको थियो ।
संघले सुदूरश्चिम खेलकुद विकास परिषद्को सहयोगमा यसअघि पुसमा सुदूरपश्चिमको धनगढी र कन्चनपुरमा स्कुल टु ओलम्पिक कार्यक्रम आयोजना भएको थियो । सुर्खेतमा एसओएससहित विभिन्न ७ विद्यालयका विधार्थीको उत्साहजनक सहभागिता रहेको थियो ।
नेपाल ओम्पियन संघका अध्यक्ष दीपक विष्टले अनुशासन, अठोट , समपर्णले मात्र खेलाडीलाई सफलता मिल्ने बताउनु भयो । उहाँले भन्नु भयो, मेरो सक्रिय खेल जीवनमा पटक चोटग्रस्त भए । तर कहिल्यै हिम्मत हारिन । लगातार प्रयास गरिरहे जसले गर्दा सागमा लगातार ४ पटक स्वर्ण पदक, एसियाली खेलकुदमा दुई पटक कास्य पदक र ओलम्पिकमा देशको प्रतिनिधित्व गर्ने अवसर पाएको थिए । सायद अनुशासित र समपर्ण नभएको भए मैले त्यो सफलता प्राप्त गर्ने थिएन ।
जुडोमा सागकी रजत तथा कास्य पदक विजेता समेत रहेकी देवु थापा कर्णालीको विगट जिल्ला जुम्लामा जन्मे पनि नेपाल प्रहरीमा भर्ना भएपति खेलकुदमा लाग्ने अवसर मिलेको स्मरण गर्नु भयो । जुम्लामा जन्मिएर १४ वर्षको उमेरमा प्रहरी सेवामा प्रवेश गरेपछि जुडोमा आबद्ध हुने अवसर पाए । त्यसले मलाई जीवनमा सफलतातर्फ डोरायो, उहाँले भन्नु भयो, ११ औं सागमा मबाट स्वर्ण पदकको आशा गरिएको थियो । तर दुर्भाग्य १० तलाबाट लिफ्ट झरेपछि घाइते भए । चोटग्रस्त अवस्थामै खेलेर पनि कास्य पदक जिते । त्यो मेरो लागि स्वर्ण पदक बराबर थियो । हामीले सक्यौं भने भविष्यमा तपाईहरुले पनि कोशिस गर्नुभयो भने ओलम्पिक खेल्ने सम्भावना रहन्छ ।
१० औं सागका भारोत्तोलनका स्वर्ण पदक विजता ओलम्पियन कमल अधिकारीले आर्थिक अवस्था कमजोर भएको अध्ययनलाई निरन्तरता दिन नसकेको स्मरण गर्दै भन्नु भयो, मैले पढ्न पाएन । घरको कमजोर आर्थिक अवस्थाले गर्दा धेरै पढ्न पाइन । नेपाल सेनामा आबद्ध भएपछि खेल जीवन अघि बढाए । यहि खेलले मलाई सबैमा परिचित गरायौं । खेलाडी हुनुमा मलाई गर्व छ । विष्ट, थापा र अधिकारी तीनै जनाले एकै पटक सन् २००८ मा बेजिङ ओलम्पिकमा सहभागिता जनाउनु भएको थियो ।
१३ औं सागका स्वर्ण पदक विजेता सुर्खेतका स्थायी निवासी दीपक हमालले स्कुल पढ्दा फिल्म हेरेर उसु खेलमा लाग्न प्रेरणा मिलेको स्मरण गर्नु भयो । उसु खेल्न सुरु गरेको केहि वर्ष मैले सफलता हात पार्न सकिन । केहि निराश पनि भए, नवौं राष्ट्रिय खेलकुदमा कर्णालीका लागि स्वर्ण पदक जितेका उहाँले भन्नु भयो, तर मलाई उसुमा अघि बढ्न अझै मेहनत गर्नुपर्छ भन्ने लाग्यो र कुनै दिन जित्छु भनेर दृढ भए । त्यसैले मलाई सफलता दिलायो । अझ धेरै गर्न बाँकी छ । कोशिस गरिरहन्छुु ।
जुम्लाको खलंगामा शुक्रबार चन्दननाथ नमुना माविमा भएको कार्यक्रममा ओलम्पियन तथा सागका पदक विजेता हरि रोकाया पनि सहभागी हुनुहुन्थ्यो । उहाँले पनि आफ्नो खेल जीवनको बारेमा विधार्थीहरुका बीचमा चर्चा गर्नु भएको थियो । उहाँले जुम्लाका विधार्थीहरुले एथलेटिक्सको अभ्यास गर्न चाहे आफूले सहयोग गर्ने वचन दिनु भयो । राखेपका प्रशिक्षक समेत रहनु भएका रोकायाले कर्णाली स्पोर्टस क्लब सन्चालन गर्दै आउनु भएको छ ।
कर्णाली प्रदेश खेलकुद विकास परिषद्को सहयोगमा भएको स्कुल टु ओलम्पिक कार्यक्रमलाई सातै प्रदेशमा प्रदेश खेलकुदको सहयोगमा सञ्चालन गर्ने लक्ष्य रहेको अध्यक्ष विष्टले जानकारी दिनु भयो ।
सुर्खेतमा एसओएस चिल्ड्रेन भिलेजका डाइरेक्टर गोपाल घिमिरेको सभापतित्वमा भएको कार्यक्रममा कर्णाली प्रदेश सभा सदस्य विन्दमान विष्ट, कर्णाली खेलकुदका उपाध्यक्ष प्रमोद हमाल, सदस्य सचिव विश्वामित्र सन्ज्याललगायतले स्कुल टु ओलम्पिक कार्यक्रमले विधार्थीहरुमा खेल क्षेत्रमा आकर्षित हुन प्ररेणा मिल्ने विश्वास व्यक्त गर्नु भयो । संघले जुम्ला र सुर्खेतमा सहभागी विद्यालयलाई खेल फुटबल, भलिबल, जर्सी सेट प्रदान गरेको थियो ।
